CLAUDIA I KASIA CHWOŁKA

Chocioż wszyscy myślom, że my siostry to muszymy powiedzieć, że niy!

Na poczontku 2011 roku połączyły my nasze siły i na scynie możecie nos oglondać jako duet
Momy już na swoim koncie wystymp w Telewizji TRWAM i na II Festiwalu Piosynki Śląskij w Zabrzu.

Momy nadzieja, że na koncertach bydziecie sie fajnie bawić.

Kaj bydziecie mogli nos łobejrzeć bydziecie mogli przeczytać w aktualnościach a jak bydzie fajno pogoda to na żółtych motorach w całyj Polsce (i niy ino) a w szczególności na naszym piyknym Ślonsku

CLAUDIA;

 

Claudia Chwołka – przezwisko FELA. W 2010 roku ukończyłach I LO im. Powstańców Śląskich w Rybniku i tam tyż zdałach matura. Jestech studyntkom Wyższyj Szkoły Bankowości i Finansów w Katowicach.
Swoja przygoda z muzykom zaczyłach już dużo lot tymu, jeszcze jako bajtel. Łojcowie godajom, że najprzód śpiywałach a potym dopiyro nauczyłach sie łazić. Ciekawe wiela w tym prowdy. Moich piosynek idzie sie posuchać we rozmańtych rozgłośniach radiowych i w radiach internetowych, a teledyski idzie łobejrzeć we Telewizji Silesia (TVS) i TVT.
Oprócz śpiywanio mom tyż pora innych zainteresowań. Fest lubia sport a w szczególności handbal i siatkówka. Przez pora lot trynowałach piłka rynczno w drużynie Polho Czuchów, w gimnazjum chodziłach do klasy sportowyj a w liceum należałach do reprezyntacji szkoły.
Poza sportym i śpiywaniym jest jeszcze coś – Motoryzacja w pełnym wymiarze. Motocykle, rajdy i tuning. Razym z tatom majstruja coś we garażu i zawsze jeżech umaraszono od smarów po same łokcie. Czasym przidajom się takie mechaniczne umiejyntności. Co do rajdów to miałach wielkie plany. Chciałach łostać kierowcom rajdowym. Połowa tego marzynio już się spełniła, bo miałach okazja siednońć na zicu pilota rajdowego, ale te upodobanie do rajdów pora lot tymu zmiyniło się i z cztyrech kółek zrobiły się dwa. Zaraziłach się pasjom do motorów. W 2009r. zdałach egzamin na prawo jazdy kat. A i B. Wyruszyłach na nasze drogi swojom piyrszom maszynom Hondą NSR 125. W 2010 zmiyniłach motór i tera jeżdża żółtom Kruszynkom Hondą CBR 600 F4i. Idzie mie spotkać na wielu zlotach motocyklowych głównie we czwortki na zamku w Chudowie razym z narzyczonym i łojcami.

KASIA;

 

Kasia Chwołka – jak dobrze pamiyntom kiedyś łaziłach do szkoły i zdo mi się, że po tyj łostatnij szkole zostałach pigułom. Z tego pigułowanio to mi ino łostało tela, że jak mie mój chop znerwuje to mu umia na spaniu jegła do piynty wciś abo czasym jaki floster przikleić. A tak na poważnie to od czasu jak znodła się Claudia siedza w doma. Jak zaczła śpiywać to we wszystkich śpiywkach podkłodom ij drugi głos i wszyskie chórki. Od jakigoś czasu pisza tyż teksty piosynek a czasym zdarzy mi się ułożyć jakoś melodia. Przez 10lot Claudia sama wystympowała ale tera udało ij się mie namówić do wspólnego śpiywanio na scynie. Bydziecie mogli nos łoglondać na różnych festynach, koncertach i innych imprezach.A jak chcecie mie łobejrzeć w innych łoblyczkach to tyż z moim chopym jeżdżymy na motorze Hondzie Hornet i idzie nos spotkać na różnych zlotach a szczególnie na zomku w Chudowie we czwortki. W pochmurne i dyszczowe dni możecie nom pomachać na autobanie – jeżdżymy czerwonym autym z napisym na zadnij szybie „FELA” i z takom samom rejestracjom.